الرئيسية
مطر معلَّق بنصف السما
لا ينهمر ولا يرتفع
وكلما بغينا نجتمع تحت المصابيح الزرقا !!
يطيح منه رذاذ !؟
اما انهمر فرقا وإلا تقطع وصل
يا ماطر الليل لا تاقف بوسط السما
لك هالشوارع ..... إنما تكفيك ساعه !؟ ساعتين ؟؟
بنشيب وحنا واقفين تحت المظله
ماهوب خوف من البلل !؟ لكن حنين
للمصابيح الزرق , ولليلةٍ سمرا سماها صافيه
وموعدٍ لعيونها
والله غرفنا دافيه , ولها شبابيك وستاير عن البروق
لكن زهقنا بيوتنا
واللي يخليك أما أنهمر وإلا ارتفع
تمر ساعه إلا ربع ,, وتو السحاب ما يدري وش يبي !؟
وأخاف أسأل صاحبي ويقول خلنا نسري
وين نسري !؟ بدري
بدري على المسرى , ورى السحاب قمره
وقمره ورى الأبواب
تبي المطر يرقا , وتهطل نجوم وتظهر علي !
أنا لو علي , تحت تحت المصابيح الزرقا قلبي بيحوم مثل الفراش
تحت الرشاش وإلا الصحو
إلين أشوفك مقبله
والله ضلوعي مبلله بالشوق
وما ودي أحاكي صاحبي ولا أسأله !؟
يبقول خلنا نسري
وين نسري بدري
ساعه وربع وحنا واقفين تحت المظله
أما انهمر فرقا وإلا تقطع وصل
يا ماطر الليل لا تاقف بوسط السما .
البدر ..
